Во присуство на врвни шахисти, гости од целиот свет, денеска и официјално започна традиционалниот шаховски спектакл „ Опен Карпош 2015“.На петтиот по ред, грандиозен шаховски турнир, ќе се натпреваруваат околу 250 велемајстори, интернационални и ФИДЕ мајстори од 25 земји од светот.
Меѓународниот турнир во шах е во организација на локалната самоуправа и шаховскиот клуб „Гамбит Ассеко СЕЕ„, а по повод свеченото отворање градоначалникот на општина Карпош, Стевчо Јакимовски се обрати пред присутните:
– Голем поздрав од општина Карпош до сите учесници на турнирот. Квалитетот на турнирот продолжува да расте, а ние како организатор ќе продолжиме во насока на негова се поголема афирмација. Со некој од вас се гледаме веќе по петти пат, но мило ми е што денеска за прв пат се гледам со некои учесници од многубројните шаховски федерации и се надевам дека така ќе биде и во наредните години кога ќе го организираме овој настан. Мило ми е што за овој шаховски турнир има интерес не само во Република Македонија туку секаде во Европа и во светот – рече Јакимовски, пришто посебно го поздрави гостинот од Бразил кој дојде дури од Латинска Америка за да учествува на овој значаен турнир.
На турнирот се обрати и претседателот на Македонската шаховска федерација, Благоја Богоевски, кој се заблагодари за учеството на голем број мајстори на мисловната игра, при што искажа огромна благодарност за организацијата на овој настан од страна на една од најспортските општини на територија на главниот град.
Натпреварувањата започнаа вечерва, а ќе траат се до 3 април. Шаховските вештини и знаења, шахистите ќе ги прикажат во девет кола секој ден од 9.30 часот па се до 17.30 часот. Љубителите на древниот спорт, ќе имаат можност да го следат на www.chess-results.com , а делот од Live games ќе се следи на www.gambit.com.mk.
Наградниот фонд за шаховскиот турнир изнесува 16.000 евра, а за најдобриот шахист за оваа година се обезбедени 2.500 евра.